The Irish song, 'A Nation Once Again' by Thomas Osbourne Davis was the inspiration for the following:

Yn fachgen brwd a ’ngwaed ar dân,
Darllenais hanes cywrain
Tri chant a thri o arwyr glân
Fu’n gwarchod Groeg a Rhufain;
Ac yna rhoddais weddi daer
Cawn eto weld y dydd
Y chwalem furiau’r estron gaer
A dod yn Gymru rydd.


Daw Cymru’n Gymru Rydd
Daw Cymru’n Gymru Rydd
’Rôl byw yn hir dan estron gaer
Daw Cymru’n Gymru Rydd

Mor ddisglair drwy’r holl ddyddiau blin
Fu’r gobaith pell am ryddid,
Na allai serch a’i decaf rhin
Ragori ar ei lendid;
Fy ngwylio wnâi mewn llys a llan
Ac yn y maes liw dydd,
Pan gysgwn, canai ’gylch y fan ’
Daw Cymru’n Gymru rydd!

Ond nod aruchel, sanctaidd, hardd
Yw gwasanaethu rhyddid;
A gallai nwyd o isel radd
Amharu ar ei lendid;
Daw rhyddid o ddeheulaw Duw
A’i sail a’ sêl yw’r ffydd,
Drwy Gymry da caiff Cymru fyw
A dod yn Gymru rydd.

Fy unig sêl wrth ddod i oed
Oedd brwydro dros ei rhyddid,
A meithrin ysbryd, yn ddioed
Sy’n rhydd o bob aflendid;
Drwy fyw’n lân gobeithio’n wir
Caf godi ’ngwlad ryw dydd -
Nid ofer dweud, rôl caethglud hir
Bydd Cymru’n Gymru rydd!